दोलखा जिल्ला अदालतले ११ किलो सुन तस्करीमा सम्लग्न भएको आरोपमा पक्राउ परेका चौध जना मध्ये नौं जनालाई पूर्पक्षका लागि थुनामा राख्न आदेश दिएको छ । शुक्रबार जिल्ला न्यायाधीश डिल्लीरत्न श्रेष्ठको इजलाशले नौ जनालाई थुनामा पठाउने तथा तीन जनालाई धरौटीमा र दुई जनालाई साधारण तारेखमा रिहा गर्न आदेश दिएको छ । न्यायाधीश श्रेष्ठको इजलाशले सुनमाला तामाङ र चेतनाथ न्यौपानेलाई साधारण तारेखमा रिहा गर्न आदेश दिएको छ ।

धरौटीमा छुट्नेहरुमा महिमा माझी, दीपेन्द्रराज शाक्य र तिलक विक रहेका छन् । उनीहरुबाट क्रमशः माझीबाट १ करोड ७९ लाख ४० हजार रुपैयाँ, शाक्यबाट ९३ लाख ५० हजार रुपैयाँ र विकबाट ८८ लाख रुपैयाँ धरौटी लिन आदेश दिएको छ । महिमा माझी विरुद्ध ३१ करोड ११ लाख ७० हजार ४४६ रुपैयाँ १५ पैसा तथा दिपेन्द्र शाक्य र तिलक वि.क.विरुद्ध २० करोड ७४ लाख ४६ हजार ९६४ रुपैयाँ १० पैसा विगो कायम गरी मुद्दा दायर भएको तिलक वि.क.का कानून व्यवसायी किशोर सापकोटाले जानकारी दिए । वि.क.का. तर्फबाट बहर गरेका कानून व्यवसायी सापकोटाले सुन तस्करीमा सम्लग्नमाथि लगाईएको संगठित अराधको आरोप पुष्टि हुन नसक्ने जिकिर गरेका थिए ।

थुनामा राख्न पठाइएकाहरुमा आकार लामा, टासी भन्ने गेङ्रु, नुर्बु छिरिङ शेर्पा, पेम्बा तामाङ, च्याङ्बा भन्ने चस्मान तामाङ, सनद प्रधान, लालबहादुर तामाङ, केशर तामाङ र माधव कुमार मगर छन् । उक्त सुन तस्करीमा २६ जनालाई प्रतिवादी बनाइएकोमा बाह्र जनालाई फरार कायम गरिएको छ । चीनबाट दोलखा हुँदै आलुको बोरामा लुकाएर सुन तस्करी गर्दैगर्दा दोलखा प्रहरीले बिगु गाउँपालिका–१ लमाबगरबाट ४ किलो, जामुने भन्ने ठाउँबाट ३ किलो र सुनसँगै पक्राउ परेकाहरुको वयानपछि खोजतलास गर्दा दोलखाकै लामाबगरमा ढुंगा मुनि लुकाएको अवस्थामा थप ४ किलो गरी जम्मा ११ किलो सुन बरामद गरिएको थियो ।

सुरुमा केशर तामाङ र माधव कुमार मगरले ११ किलो सुन बोरामा राखेर ओसार पसार गर्दै लुकाइछिपाई राखेको अवस्थामा बरामद गरिएको थियो । पक्राउ परेकामध्ये चिनियाँ नागरिक गेङ्रले नै चीनबाट सुन मगाएर काठमाडौंमा बेच्ने गरेको प्रहरीले दावी छ । सुन तस्करीमा सम्लग्नहरुले दोलखाको विभिन्न नाकाबाट आलुको बोरामा लुकाएर सुन तस्करी गर्ने गरेकोमा सुनसहितको आलुको बोरा लुटिए पछि सोही विषयमा प्रहरी समक्ष उजुरी परेकोमा अनुसन्धानका क्रममा सुन तस्करीमा संलग्नहरु पक्राउ परेका थिए ।