काठमाडौं । अभिनेता पल शाहलाई पुर्पक्षका लागि थुनामा पठाइएको छ । बिहीबार जिल्ला अदालत, तनहुँले शाहलाई पूर्पक्षका लागि थुनामा राख्न आदेश दिएको होे । एक किशोरीमाथिको जबर्जस्ती करणीको अभियोग लागेका शाहलाई पुर्पक्षका लागि थुनामा राख्न आदेश दिएको तनहुँ जिल्ला अदालतका श्रेस्तेदार मीनबहादुर कुँवरले जानकारी दिए ।

पीडित वालिकाले दिएको घटना विवरण कागज, पीडितको शारीरिक जाँच परीक्षण रिपोर्ट, तथा घटना भएको दिन १२ बजे राती पीडितको कोठामा प्रवेश गरेको भन्ने पल शाहको वयान लगायतको आधार प्रथम दृष्टिमा नै जबर्जस्ती करणी गरेको देखिन आएको आदेशमा उल्लेख गरिएको छ ।

न्यायाधीश हरिशचन्द्र ढुंगानाको एकल इजलासले तत्काल प्राप्त प्रमाणका आधारमा विश्लेषण गर्दा प्रतिवादी पल शाह भन्ने पूर्णबिक्रम शाहले वर्ष १५ कि परिवर्तित नाम ०७८र०७९ ब्यास–१२ लाई ललाई फकाई विवाह गर्छु भनी प्रलोभन देखाई जबर्जस्ती करणी गरेको देखिन आएकाले पछि प्रमाण बुझ्दै जाँदा ठहरे बमोजिम हुने गरी हाललाई निज प्रतिवादी पल शाह भन्ने पूर्णविक्रम शाहलाई मुलुकी फौजदारी कार्यविधि संहिता २०७४ को दफा ६७ को उपदफा ९१० को खण्ड ९ख० बमोजिम थुनामा राखी पुर्पक्ष गर्ने गरी रीतपूर्वक थुनुवा पूर्जी दिई कारागार कार्यालय, दमौली तनहुँमा पठाइदिनू’ भन्ने आदेश दिइएको छ ।

शाहले जबर्जस्ती करणी गरेको अस्वीकार गरे पनि घटना भएको दिन राति १२ बजे राती पीडितको कोठामा प्रवेश गरेको स्वीकार गरेकाले जबर्जस्ती करणी गरेको तथ्यसंग मिल्न आएको आदेशमा भनिएको छ ।

पलले बयानमा घटना भएको दिन राति १२ बजे पीडितलाई म्यासेज गरी पीडितको कोठामा प्रवेश गरेको भन्ने तथ्यलाई स्वीकार गरेको आदेशमा उल्लेख गरिएको छ ।

आदेशमा भनिएको छ ‘एक्लै सुतेकी बालिकाको कोठामा राति १२ बजेतिर प्रवेश गर्नुपर्ने कुनै औचित्यता प्रतिवादीले देखाउन सकेको पाइएन । यसरी राति पीडितको कोठामा प्रवेश गरेको भन्ने प्रतिवादीको स्वीकारोक्ति सोही राति निजले पीडितलाई जबर्जस्ती करणी गरेको तथ्यसँग मिल्न भिड्न आएको देखियो’ ।

शाहविरुद्ध १६ वर्षकी किशोरीलाई प्रलोभनमा पारेर जबर्जस्ती करणी गरेको भन्दै जिल्ला सरकारी वकिल कार्यालय तनहुँले अदालतमा अभियोग पत्र दर्ता गरेको थियो ।

बुधबार र बिहीबार दुई दिन थुनछेक बहसपछि शाहलाई पूपक्षका लागि थुनामा पठाउने आदेश दिइएको हो । पल शाह विरुद्ध पीडितका बुबाले जिल्ला प्रहरी कार्यालय तनहुँमा ११ फागुनमा किटानी जाहेरी दिएका थिए ।