तपस्वी रामबहादुर बम्जनको घरबाट ३ करोड रुपैयाँ बरामद
- January 10, 2024
- 3 years ago
तपस्वी रामबहादुर बम्जनको घरबाट प्रहरीले करिब साढे ३ करोड रुपैयाँ बरामद गरेको छ ।
बुधवार प्रहरीको केन्द्रीय अनुसन्धान ब्युरो (सीआईबी) ले पत्रकार सम्मेलन गर्दै बम्जनको घरबाट ३ करोड ३० लाख ९२ हजार नेपाली रुपैयाँ र १६ देशका विदेशी मुद्रा बरामद गरेको जानकारी गराएको छ । त्यस्तै मोबाइल, ल्यापटप र तपस्वी बम्जनले चढ्ने गाडी समेत प्रहरीले बरामद गरेको पत्रकार सम्मेलनमा जानकारी दिएको छ । सीआईबीले मंगलबार तपस्वी बम्जनलाई काठमाडौंको बुढानिलकण्ठबाट पक्राउ गरेको थियो। सानै उमेरमा लामो समय निरहार तपस्या गरी विश्व विख्यात बनेका बम्जनको हजारौ अनुयायी थिए ।
लिटिल बुद्धको नामले चर्चित तपस्वी बम्जनले आफ्नो मैत्री मंगलम धर्म भन्दै धर्मको प्रचार गर्दै आएका थिए । उहाँलाई आश्रम बसेका महिला अनुयायी माथि यौनहिंसा गरेको तथा व्यक्ति वेपत्ता पारेको आरोप थियो । तपस्वी बम्जन विरुद्ध पाँच वटा जाहेरी परेको थियो । सोही विषयमा प्रहरीले उहाँलाई पक्राउ पुर्जी जारी गरी खोजी गरिरहेको थियो ।
बाराको हलखोरियास्थित जंगलमा आश्रम बनाए बसेका तपस्वी बम्जन पछिल्लो समय सिन्धुलीको कमलामाई नगरपालिकामा आश्रम बनाई बस्दै आएका थिए । सीआईबीले तपस्वी बम्जनलाई पक्राउ गर्न २०७७ मा पनि उहाँको आश्रममा छापा मारेको थियो । तपस्वी बम्जनमाथि झुटो आरोप लगाएको भन्दै उहाँको अनुयायीहरुले विरोध गर्दै आएका थिए ।
