शान्ति प्रक्रियालाई पूर्णता दिन गठबन्धन आवश्यक : देउवा
- November 15, 2022
- 4 years ago
प्रधानमन्त्री एवम् नेपाली कांग्रेसका सभापति शेरबहादुर देउवाले शान्ति प्रक्रियाका बाँकी काम पूरा गर्न गठबन्धन आवश्यक भएको बताएका छन् । मंगलवार चुनाविसभालाई सम्बोधन गर्न सुर्खत पुगेका सभापति देउवाले संविधानको रक्षा, स्थायित्व र शान्तिका लागि लोकतान्त्रिक–वाम गठबन्धन निर्माण भएको बताएका हुन् ।
उनले पाँच दलीय गठबन्धन संविधानको पूर्ण पालना गर्दै स्थिर सरकार निर्माण, शान्ति प्रक्रियाका बाँकी कामहरुको पूर्णता र तीव्र आर्थिक विकासमा केन्द्रित हुने पनि बताए । नयाँ संविधानको रक्षा गर्दै विकास र समृद्धिकालागि गठबन्धन गरेकाले शंका नगर्न आग्रह गर्दै सभापति देउवाले गठबन्धनका उम्मेदवारहरुलाई विजयी गराउन आग्रह गरे ।
त्यस्तै नेकपा माओवादी केन्द्रका अध्यक्ष पुष्पकमल दाहालले अहिलेको गठबन्धनलाई पाँच पाण्डव भनेर सम्झिए पुग्ने बताए । उनले पाँच पाण्डव विरुद्ध कौरवहरुको समूह देखा परेकाले एकढिक्का भएर अगाडि बढ्न सुझाव दिए । उनले गठबन्धनले संविधानको रक्षा गर्दै कोरोना नियन्त्रण, संविधानको मर्म र भावनाअनुसार स्थानीय तहको निर्वाचन सम्पन्न सफल भएको बताए ।
दाहालले निर्वाचनमार्फत अहिलेको गठबन्धनलाई अझै बलियो बनाउँदै लगिने बताए । १२ बुँदे र बिस्तृत शान्ति सम्झौतापछि देश नयाँ युगमा प्रवेश गरेको स्मरण गर्दै अध्यक्ष दाहालले यही गठबन्धनले शान्ति प्रक्रियालाई पूर्णता दिने बताए ।
