टुकुचा खोला मिचेर बनाएको संरचना नभत्काउन उच्च अदालतको आदेश
- September 18, 2022
- 4 years ago
टुकुचा खोला मिचेर बनाएको संरचना तत्काल नभत्काउन उच्च अदालत पाटनले अन्तरकालीन आदेश दिएको छ । प्रेसिडेन्ट ट्राभल्स एण्ड टुर्स प्रालिको तर्फबाट भोलाविक्रम थापासमेतले दायर गरेको रिटमाथि सुनुवाइ गर्दै न्यायाधीश दिपेन्द्रबहादुर बमको इजलासले यस्तो आदेश दिएको हो । उच्च अदालतले असोज ५ गते दुबै पक्षलाई छलफलमा बोलाएको छ ।
काठमाडौं महानगरपालिकाले टुकुचा खोला मिचेर बनाइएका संरचना धमाधम भत्काउन थालेपछि रिट दायर भएको हो । महानगरपालिकाले जय नेपाल सिनेमा हलमा र लक्ष्मी बैंकको संरचना खनेर टुकुचा खोलाको सहत निकालेको थियो ।
प्रक्रिया बमोजिम नक्सा पास गरेको र निर्माण सम्पन्नको प्रमाणपत्र समेत लिएको देखिएकाले तत्काल संरचना नभत्काउन अन्तरकालीन आदेश दिएको र दबै पक्षलाई छलफलमा बोलाइने उच्च अदालत पाटनका रजिस्ट्रार ठगिन्द्र कट्टेलले जानकारी दिए ।
काठमाडौंको सम्यातासंग जोडिएको टुकुचा खोला पुरेर संरचना बनाइएपछि हाल महानगरपालिकाले खोला अतिक्रमण गरेर बनाएको संरचना भत्काउन थालेको थियो । यस अभियानमा सर्वसाधारणले साथ दिए पनि घर धनीहरुले भने प्रक्रिया पुर्याएर बनाएको संरचना विना सूचना भत्काएको भन्दै आक्रोश पोख्दै आएका थिए ।
