एसपीपी मान्य नहुने प्रधानसेनापति शर्माको भनाई, सञ्चारमाध्यममा आएको डकुमेन्ट आधिकारिक नभएको दाबी
- June 17, 2022
- 4 years ago
एसपीपीबारे सञ्चारमाध्यममा आएको डकुमेन्ट आधिकारिक नभएको नेपाली सेनाका प्रधानसेनापति प्रभुराम शर्माले दाबी गरेका छन्। शुक्रबार संसदको अन्तर्राष्ट्रिय सम्बन्ध समितिको छलफलमा प्रधानसेनापति शर्माले अहिले सञ्चारमाध्यममा आएको डकुमेन्ट आधिकारीक नभएको दाबी गरेका हुन् । नियोजित ढंगले केही संञ्चार माध्यमले नेपाली सेनाले पठाएको पत्र भन्दै भ्रम छर्न खोजेको उनको दाबी थियो । नेपाली सेनाले नेपाली जनताको भावना विपरित काम नगर्ने भन्दै उनले नेपाल र नेपालीको एकता भड्काउन केही मानिसहरुले उचालेर भ्रम छर्न खोजेको बताए ।
एसपीपी कुनै पनि हालतमा नेपालको हितमा नरहेको भन्दै मानवीय सहायताबाहेक सैन्य सहायतामा समावेश हुने कुरा नेपाली सेनालाई मान्य नहुने समेत उनले स्पष्ट पारे। प्रधानसेनापति शर्माले नेपाली सेनाले २७ अक्टोबर सन् २०१५ मा एसपिपीलाई लेखेको पत्र भूकम्पका वेलामा मानवीय सहयोगका लागि लेखिएको प्रस्टीकरण दिएका थिए ।
उक्त पत्रमा सैन्य सम्झौतामा जोडिने विषय उल्लेख नभएको भन्दै उनले सैन्य सम्झौतामा जोडिने कुरा नेपाली सेनालाई स्वीकार्य नहुने बताए। त्यस पछि दुईवटा चिठी लेखिएको बताएका प्रधान सेनापतिले उक्त चिठी अमेरिकी सरकारबाट स्टेट पार्टनरसिप प्रोग्राममा विपतका वेला आवश्यक पर्ने औजारहरू मात्रै सहयोग गरे पनि कुनै गोलीबारुद नदिएको बताए ।
