उपत्यकाको जग्गा कित्ताकाट फुकुवा गर्न सिफारिस
- March 24, 2022
- 4 years ago
काठमाडौं । काठमाडौं उपत्यकामा कित्ताकाट फुकुवाको हुने भएको छ । उपत्यका भौतिक विकास समितिले नयाँ शहर निर्माणका लागि कित्ताकाट फुकुवा गर्ने सिफारिस गरेको हो ।
विहिवार शहरी विकास मन्त्री रामकुमारी झाँक्रीको अध्यक्षतामा बसेको बैठकले एक लाख रोपनीमध्ये ४४ हजार रोपनी जग्गाको कित्ताकाट फुकुवाका लागि मन्त्रिपरिषद्लाई सिफारिस गर्ने निर्णय गरेको हो । झाँक्रीको अध्यक्षतामा बसेको भौतिक विकास समितिको १७औं बैठकले नयाँ शहर विकासको लागि काठमाडौं र भक्तपुरका पाँच नगरपालिकाभित्र पर्ने ४४ हजार रोपनी जग्गाको कित्ताकाट फुकुवा गर्न सिफारिस गर्ने निर्णय गरेको हो ।
रोक्का राखिएको एक लाख रोपनीमध्ये ५६ हजार रोपनीमा नयाँ शहर निर्माण गर्न सकिने भएकाले जग्गा कित्ताकाट रोक्का भने यथावत नै राखेको छ । समितिले काठमाडौं जिल्लाका कागेश्वरी मनोहरा नगरपालिका र शंखरापुर नगरपालिका, भक्तपुर जिल्लाको भक्तपुर नगरपालिका, मध्यपुर थिमी नगरपालिका र चाँगुनारायण नगरपालिकाको नयाँ नगर विकास योजना स्वीकृत गर्ने सिफारिस गरेको छ।
सरकारले २०७४ बैशाख २४ गते काठमाडौं उपत्यको चार क्षेत्रमा नयाँ नगर निर्माणका लागि भन्दै एक लाख रोपनी जग्गाको कित्ताकाट रोक्का राख्ने निर्णय गरेको थियो । समितिको बैठकले काठमाडौंको पूर्वी नयाँ शहरी योजना स्वीकृतको लागि समेत मन्त्रिपपिरषदमा पठाउन सिफारिस गरेको छ ।
